ALIWAN AVENUE’s TOP 10 GREAT FILIPINO ACTRESSES

Basagan ba ng trip ang hanap? Well, I’m sorry pero makaraan ang mariin at masinop na pagninilaynilay sinabayan pa ng matalinhagang pagmumuni-muni, narating ng ALIWAN AVENUE ang isang listahan kung saan ay bibigyan pugay ang sampu sa pinakamatinding artistang babae na naganap sa industriya ng pelikulang Pilipino hanggang sa mga oras na ito. Sampu lang kasi aapaw na pag sumobra pa rito. Tanggapin man nating marami pang ibang dapat ay nagsumiksik sa listahan pero dahil sariling diskarte ito ay tinapyas na at nakasisiya rin naman ang kinahinatnang listahan…

MERCEDES CABRAL.  Siya ngayon ang tinaguriang INDIE QUEEN.  Sa lahat kasi ng mga nagsulputang mukha, si Mercedes ang bukod tanging namayagpag ng walang pagpapasubali sa pagpalaganap ng kanyang sining sa bawa’t sinalihang indielikulang digital.  Mahirap nang tawaran ang unang sinalihang SERBIS kung saan ay nagmistulang kanbas ang kanyang mukha at hinayaang pintahan ito ni Brilliante Mendoza ng sari-saring anyo.

NORA AUNOR.  Kahit iiwanang blangko ang bahaging ito, maraming eksenang papainlanlang sa ating mga balintataw lalo na’t mahigit nang apatnapung taon na siya sa industriya.  Matindi ang pinarating niyang damdamin sa HIMALA, TATLONG TAONG WALANG DIYOS, MINSA’Y ISANG GAMUGAMO at marami pang panooring kay hirap mawagli’t sa alaala.

ANITA LINDA. Beterana. Walang dudang isa siyang bantayog at imaheng dapat tularan ng bawa’t artista. Sa kanyang edad ngayong mahigit 80, patuloy pa rin siyang nagiging sangkap upang mapatingkad ang mga pelikula ng bagong henerasyon. Klasikal nang maituturing ang kanyang ipinamalas sa TATLO DALAWA ISA.

HILDA KORONEL.  Nakatatak na si INSIANG sa ating mga isipan.  Sa edad niyang 18 ay naihubog siya ni Lino Brocka bilang isang henyo sa larangan ng pag-arte.

CELIA RODRIGUEZ. Mas lalong nakilala sa pagiging maldita dahil sa kanyang pagkamestisa, mayroong mahabang listahan ng matining na pagganap si Manay Celia lalo na sa LILET at LA PALOMA.

MARICEL SORIANO. Nagsimulang child star at nahubog sa pagdaan ng panahon, nakilala ring mataray nguni’t nang mabungaran siya sa HINUGOT SA LANGIT ni Ishmael Bernal itinayo niya ang sarili bilang isa sa mga pinakamatinding artista ng kanyang panahon.

DINA BONNEVIE. Underrated si Dina.  Napakarami niyang pagganap na buong husay niyang ginampanan nguni’t sa di maunawaang dahilan ay iilan lamang sa mga ito ang nabigyan pansin. Mula KATORSE hanggang sa GUMAPANG KA SA LUSAK ni Brocka , masasabing may sarili siyang genre na iginawad sa industriya.

VILMA SANTOS. Syempre, si Ate Vi ang template ng histrionics… tilian at sigawan at kahit pa umeemote ay pilit pa ring makikita ang ganda. Kamado niya ang pagbibigay buhay sa papel na mukhang sadyang isinulat para sa kanya.

JUDY ANN SANTOS.  Malalim ang pinaghuhugutan marahil ni Juday. Nailalabas niya ang ubod ng mga karakter na iniatang sa kanya. Nakakabahala ang kanyang pagganap sa ISABEL at mukhang marami pang panindak siyang maihahain sa madlang manonood.

LOLITA RODRIGUEZ.  The Drama Queen. Tunay na larawan ng isang artistang ramdam mo ang hiningang ikinabit sa bawa’t papel… siya talaga si Kuwala sa TINIMBANG KA NGUNI’T KULANG!